جب تک فلسطین پرقبضہ برقرارہے، اسرائیل کے لیے بھی کوئی تحفظ نہیں:ھنیہ

اسلامی تحریک مزاحمت ’’حماس‘‘ کے سیاسی شعبے کے نائب صدر اور سابق فلسطینی وزیراعظم اسماعیل ھنیہ نے واضح کیا ہے کہ جب تک ارض فلسطین پرصہیونیوں کا ناجائز قبضہ برقرار ہے، تک اسرائیل کو بھی کسی قسم کا تحفظ حاصل نہیں ہوگا۔ آخری فلسطینی پناہ گزین کی وطن واپسی اور آباد کاری تک صہیونیوں کے ناجائز قبضے کے خلاف جدو جہد جاری رہے گی۔

مرکزاطلاعات فلسطین کے مطابق اسماعیل ھنیہ نے ان خیالات کا اظہار اتوار کے روز غزہ اسلامی یونیورسٹی
کے زیراہتمام ’’مسلم دنیا اور صہیونیت کے درمیان کشمکش کا مستقبل‘‘ کے عنوان سے خطاب کےدوران کیا۔ انہوں نے مقبوضہ بیت المقدس میں گذشتہ ہفتے فلسطینی نوجوان معتز حجازی کے ایک انتہا پسند یہودی ربی یہودا گلیک پرقاتلانہ حملے کی تعریف کی اورکہا کہ یہ کارروائی قابل تعریف ہے۔

حماس رہ نما نے استفسار کیا کہ بیت المقدس اور اہالیان بیت المقدس کے خلاف صہیونی ریاست کے جرائم کیا  دہشت گردی نہیں۔ ہمارے وطن کی سرزمین پرقبضہ کیا دہشت گردی نہیں۔ مقدس مقامات کی بے حرمتی کیا دہشت گردی نہیں، مسجد اقصیٰ کی بندش اور اس پرانتہا پسندوں کی یلغار دہشت گردی نہیں۔ کیا صرف فلسطینی دہشت گرد ہیں جو اپنے دفاع کے لیے بندوق اٹھانے پر



مجبور ہیںـ

انہوں نے کہا کہ غزہ کی پٹی اسلام کی عظمت اور اس کی سربلندی کے لیے جدو جہد کرنے والوں کا دارالحکومت ہے۔ ایک طرف پورا مغرب اورصہیونی قوتیں فلسطینیوں کے خلاف مجتمع ہیں۔ اس کے خلاف دوسری طرف مٹھی بھر فلسطینی بہادر قوم نے دشمن کو ناکوں چنے چبوائے ہیں۔ انہوں نے کہا کہ دور حاضر کی سب سے خطرناک برائی غاصب ریاست سے تعلقات کی دعوت دینا ہے۔

سابق فلسطینی وزیراعظم نے عالم اسلام، عرب ممالک اور عالمی برداری پر زور دیا کہ وہ بیت المقدس، مسجد اقصیٰ کے دفاع اور فلسطین کی آزادی کے لیے ایک مربوط اور مبسوط حکمت عملی وضع کریں اور اس کی روشنی میں عملی اقدامات کیے جائیں۔ محض مذمتی بیانات سے فلسطین آزاد نہیں ہوسکتا اور نہ ہی قبلہ اول کو یہودیوں کی ریشہ دوانیوں سے بچایا جاسکتا ہے۔